संविधानको मस्यौदामा सुझाव संकलन गर्न ‘फन्डेड’ नक्कली साइट

संविधानसभाले साउन ५ गते राति १२ बजेदेखि आफ्नो आधिकारिक वेबसाइट र इमेलबाट सुझाव संकलन कार्य बन्द गरिसकेको छ। तर कसले चलाएको हो समेत नखुलाइएको बेवारिसे वेबसाइटले भने यो ब्लग तयार पार्दासम्म सुझाव संकलन गर्ने काम जारी राखेको छ। [अपडेट : बुधबार मध्याह्न हेर्दा भने यो साइटमा पनि सुझाव लिन बन्द गरिएछ]

संविधानसभाले सुझाव संकलन गर्न जिम्मा दिएको नागिरक सम्बन्ध तथा संविधान सुझाव समितिले सार्वजनिक गरेको एक मात्र आधिकारिक साइट थियो parliament.gov.np तर फेसबुकमा डलर खर्च गरी विज्ञापन समेत दिई एउटा बेवारिसे वेबसाइट constitution.org.np ले पनि सुझाव संकलन गर्न थालेको थियो।

आफ्नो कार्यक्षेत्रमाथि हस्तक्षेप गरेर अनधिकृत रुपमा यसो हुँदासमेत संविधानसभाको समिति भने चुपै बसेको छ।

constitution.org.np कसले चलाएको हो, वेबसाइटमा कुनै उल्लेख छैन। तर वेबसाइटको मुन्तिर सपोर्टेड बाई भन्दै अन्तर्राष्ट्रिय संस्थाहरु युएनडिपी, इन्टरनेसनल आइडिया र युएन वुमेनको लोगो राखिएको छ। यी संस्थाहरुले ‘सपोर्ट’ गर्ने भए संविधानसभामार्फत् गर्नुपर्ने हो। यसरी आफू स्वयंले संविधानसभाको सम्बन्धित समितिले गर्ने काममा हस्तक्षेप गर्न पाउँदैनन्।

यसो हेर्दा यो कुन चाहिँ एनजिओ वा आइएनजिओले रिपोर्ट देखाएर डलर कुम्ल्याउन बनाएको योजना जस्तो लाग्यो। कसले चलाएको हो भन्ने नै निश्चित नभएको, सुझाव संकलन गर्ने आधिकारिक निकायले समेत नचिनेको यो साइटले ‘तपाईँले दिएको सुझाव संविधानसभामा पठाइने छन्’ लेखेको रहेछ। तर पठाएन भने को जिम्मेवार? आधिकारिक रुपमा सुझाव संकलनै बन्द भइसक्यो भने यो साइटले लिएको सुझाव कहाँ लगेर राख्ने ? रद्दी टोकरीमा?