फ्रान्समा सबलाई पछाडि पार्ने मीरा रोजगारीका लागि झण्डै मलेसिया पुगेकी थिइन्

भोजपुरकी गाउँले युवती मीरा राईले फ्रान्सको फ्रान्सको चामोनिक्समा हुने वार्षिक मोन्ट ब्लान्क म्याराथनको ८० किलोमिटर तर्फको अल्ट्रा उपाधि जितेर नेपालको नाम राखिन्। यो समाचार आए लगत्तै केही माओवादी नेता र कार्यकर्ताहरु हाम्रा जनसेना, अयोग्य भनेर निकाल्या थिए, देख्यौ त योग्यता भन्दै उफ्रेका देखिए।

सबभन्दा पहिला त के बुझौँ भने माओवादी युद्धमा छँदा मीरा लडाकु बनेर लड्न गएकी हैनन्। माओवादी शान्ति प्रक्रियामा आइसकेपछि आफ्नो सेनाको संख्या बढाउन धमाधम भर्ती गर्ने क्रममा उनलाई पनि भर्ती गरिएको हो। १४ वर्षकै उमेरमा उनलाई भर्ती गरिएको थियो। यो कुरा उनले हङकङमा उपाधि जितेपछि साउथ चाइना मर्निङ पोस्टलाई बताएकी हुन्। त्यसैले उनी युद्ध लडेका वास्तविक लडाकु नभएर माओवादीको स्वार्थपूर्ति गर्ने माध्यम बनाइएकी एक अबोध किशोरी थिइन्।

सेना समायोजनका लागि युएन र सेनाको टिमले उनलाई अयोग्य बनाउनुको कारण पनि अरु नभएर उमेर नै थियो। बाल सैनिकका रुपमा उनलाई भर्ती गरिएको भएरै उनी अयोग्य भएकी थिइन्।

अयोग्य भइसकेपछि उनलाई जम्मा १० हजार रुपैयाँ र घर फर्कने खर्च दिइयो। झण्डै उनी कामका लागि मलेसिया पुगिसकेकी थिइन्। तर उनलाई मलेसियाका सामान्य मजदूर होइन, राष्ट्रले गौरव गर्ने खेलाडी बन्ने संयोग कसरी जुर्‍यो, यसबारे कराते प्रशिक्षक ध्रुवविक्रम मल्ल फेसबुकमा यस्तो लेख्छन्-

मीरा कराते खेलाडी हुन्। खेलको नेचर अनुसार उनमा देखिएको प्रतिभालाई मध्यनजर गरी कराते खेल भन्दा लामो दुरीको दौडमा राम्रो गर्न सक्छ भनी ट्रेनिङ गर्ने वातावरण बनाइदिने मेरो सोच भयो। त्यही अनुसार जानकारी गराई र प्रशिक्षण अभ्यासमा लाग्न थालिन्। बीचमा जन्मथलो सानु दुम्बा भोजपुर घर गएकी मीरा केहि महिना सम्पर्कविहीन भइन् र मलेसिया रोजगारीको लागि जान भनी काठमाडौँ आइन् र मसँग गेम खेल्न नसक्ने बाध्यताको कुरा राख्दै रोजगारी गर्नु पर्ने बताइन्।

मीराको प्रतिभालाई गुम्न नदिई माथि उचाल्नु पर्छ भन्ने मेरो सोचाई अनुसार एक वर्ष बिहान बेलुका नियमित टेनिङ्ग गर्ने, खान बस्न सबै व्यवस्था हुने भन्दा उनी धेरै खुसी भइन्।

मेरो घरमा बहिनी कविताले सबै खानपिनको व्यवस्था गर्न थालिन्। त्यसपछि नियमित प्रशिक्षणमा सहज हुन् पुग्यो। मलेसिया जान एक मेनपावरमा रहेको पासपोर्ट भिसा आएको र नगएको भन्दै १२ हजार तिर्नु परेको थियो।

त्यस पछिको सफलता

बेलायतका नागरिक रिचार्ड बुलको सक्रियतामा आयोजना गरिएको काठमाडौँ रानीवनदेखि मकवानपुर सम्मको ५० किलोमिटर अल्ट्रा म्याराथन प्रतियोगिता देखि प्रथम पुरस्कार जित्न सफल हुन् सुरु गरेकी मिराको यात्रा – अहिलेसम्म सेकेन्ड हुन परेको छैन।

– इटालिमा भएको ५० किलोमिटर अल्ट्रा म्याराथन प्रतियोगिता २६,आक्टोबर २०१४ मा प्रथम स्थान
– हङ्गकङ्गमा भएको ५० किलोमिटर एशियन च्याम्पिन अल्ट्रा म्याराथुन प्रतियोगिता ७,फेब्रअरी २०१५ प्रथम स्थान
– फ्रान्समा २६ जुन २०१५ मा ८० किलोमिटर विश्व च्याम्पिनसिपमा प्रथम स्थान जित्न सफल भई विश्वमा रहेको नेपालीहरूको मनोबल उच्च बनाउदै विश्व सामु राष्ट्रिय झन्डा उठाएर करोडौं नेपाली जनताको सम्मान दिलाएकोछ साहासिक कार्यको उच्च मुल्यांकन नेपाल सरकारबाट होस्।