२०७२ सालको वैशाख १२ मा ठूलो भूइँचालो आयो। यति ठूलो आयो कि यो पुस्ताले अहिलेसम्म भोगेको ठूलो विपत्ति हुनपुग्यो। योभन्दा पहिले यस्तो कहिले भएको थियो भनेर खोज्दै जाँदा पुग्नुपर्ने भयो विक्रम संवत् १९९० सालमा। त्यतिबेला ब्रह्मशमशेरले एउटा किताब लेखेका थिए। त्यो ज्यादै पुरानो किताब कतिको घरमा थियो होला। कतिको घरमा किराले खाइसकेको होला। ७२ सालको भूँइचालोपछि सबले यो किताब खोज्न थाले। हुनत यसको अंग्रेजी अनुवाद बजारमा पाइन्छ तर नेपाली नै पढ्न चाहनेलाई विकल्प थिएन।
हो, यही मागलाई ध्यानमा राख्दै पुस्तक पुनः प्रकाशन गर्नेतर्फ प्रकाशकहरुको ध्यान गयो। हुँदाहुँदा यो एउटै किताब तीन वटा प्रकाशकले छाप्ने भइसकेछ। सबैले अर्को सातासम्म किताब बजारमा ल्याउने भनिरहेका छन्। योसँगै प्रकाशकहरुले यो किताब छाप्ने अधिकार हामीसँग मात्र छ, तिमीहरुसँग छैन भनेर झगडा गर्न थालेका छन्।