नेदरल्याण्डमा राजेश हमालले एक अरब उठाएको भन्ने समाचार निराधार, भ्रमको पछि नलाग्न नेदरल्याण्डबासीहरुको आग्रह

-अमित कार्की-

केही दिनदेखि केही नेपाली संचारमध्यममा नेदरल्याण्डमा नायक राजेश हमालले भूकम्पपीडितको लागि १ अरब रकम जुटाए भन्दै आएको समाचारप्रति नेदरल्यान्डमा रहने नेपालीहरु र डच नागरिकले तिब्र आक्रोश र प्रतिक्रिया व्यक्त गरेका छन्। नेपालमा भूकम्पपश्चात् डच संचारमाध्यम र डच संस्थाहरुको सामूहिक पहलमा संचालन गरिएको Giro ५५५ (डच उच्चारण खिरो ५५५) नामको खातामार्फत् उक्त रकम जम्मा भएको थियो। नेदरल्याण्डमा ING बैंकको खातालाई Giro भनिन्छ। उक्त बैंकमा खोलिएको NL08 INGB 0000 000555 अर्थात् अन्तिमको तीन वटा पाच बाट Giro 555 अभियान नाम रखिएको हो।

यो अभियानले विभिन्न देशमा उत्पन्न हुने राष्ट्रिय संकटमा यही खातामार्फत् रकम जम्मा गरी पठाउने काम गर्छ। उदाहरंणको लागि २००४ मा आएको एसियाको सुनामीमा यही अभियानले सबै भन्दा धेरै २०८ मिलियन यूरो रकम सहयोग गरेको थियो भने २०१० को हाइटीमा आएको शक्तिशाली भूकम्पबाट पीडितको लागि करिब १११ मिलियन यूरो सहयोग संकलन गरेको थियो।

गत अप्रिल २५ मा नेपालको गोरखा जिल्ला बार्पाकलाई केन्द्रबिन्दु बनाएर आएको भूकम्पपछि यो अभियानले नेपालका भूकम्प पीडितको सहयोगको लागि राष्ट्रिय अभियान नै संचालन गरेको थियो। सहयोग संकलनको लागि उक्त अभियानसँग सम्बद्ध डच संघ संस्थाका स्वयंसेवक, विद्यार्थीहरु अहोरात्र सहयोग जुटाउन खटिएका थिए।

उक्त अभियानलाई नेदरल्याण्डमा रहने नेपाली समुदाय र संघसंस्थाहरुले समेत साथ,समर्थन र ऐक्यबद्दता जनाएका थिए। यो अभियान जारी रहँदा व्यक्तिगत भ्रमणको सिलसिलामा नेदरल्याण्ड आइपुगेका हमाल एनआरएन नेदरल्याण्डसहितका केही स्थानीय संस्थाहरुले आयोजना गरेको एक कार्यक्रममा उपस्थित भएका थिए।

यो कार्यक्रममा करिब १५०० यूरो रकम संकलन भएको थियो। यति बेलासम्म Giro 555 मा करिब ७० करोड भन्दा बढी रकम जम्मा भइसकेको थियो। त्यस दिन उक्त अभियानको अन्तिम दिन थियो। उक्त दिनलाई नेपाल विशेष दिन भनेर घोषणा गरिएको थियो र नेपाली स्थानीय कलाकार, संघसंस्थाहरु लगायतका सँग विभिन्न कार्यक्रमको आयोजना गरिएको थियो।

यही अवसरमा नेपालीहरुले डच मिडियाहरु समक्ष राजेश हमाललाइ पुर्‍याएका थिए। उक्त कार्यक्रममा हमालले नेपालका भूकम्प पीडितहरुको लागि सहयोग गर्न आग्रह समेत गरेका थिए।

यसरी उक्त अभियानले ८.६ मिलियन यूरो अर्थात् करिब ९६ करोड ४६ लाख रकम जम्मा गरेको थियो। तर भोलिपल्ट नेपाली अनलाइन संचार माध्यममा नेदरल्याण्डमा राजेश हमालले एक अरब सहयोग जुटाए भन्ने समाचार प्रकाशित भयो। यो समाचार लगत्तै नेदरल्याण्डमा रहने नेपालीहरुले तिब्र आक्रोश पोख्न शुरु गरे।

विषय र प्रसंगलाइ नबुझी समाचार प्रकाशित भएको भन्दै सामाजिक संजालमा समेत खण्डन र प्रतिक्रिया आउन थाल्यो। तर यता खण्डन र प्रतिक्रिया आउँदै गर्दा यही समाचारलाई नेपालका राष्ट्रिय मिडिया कान्तिपुरले पनि प्राथमिकताका साथ प्रकाशित गरे।

समाचारबारे नेदरल्याण्ड बाट पुष्प बरुवालले आफ्नो फेसबुक पेजमा यसो लेखेका छन्

“राजेशजीले त्यो रकम संकलन गर्नुभएको होइन। उहाँको उपस्थिति रह्यो र त्यही नै उहाँको कन्ट्रिब्युशन हो। अहिले राजेश हमालले ९० लाख (कतै ९० करोड पनि) पैसा उठाउनुभयो भनेर मिडियामा आएको समाचार तथ्यहीन छ। यो समाचारबाट नेदरल्याण्डका नेपाली र नेपाली बुझ्ने डचहरु विक्षिप्त बनेका छन्।”

त्यस्तै एनआरएन नेदरल्याण्डका वरिष्ठ उपाध्यक्ष हिमाल गुरुङले उक्त समाचार सरासर झुटो र तथ्यहीन भन्दै राष्ट्रिय विपतको यो घडीमा संयमित भएर समाचार प्रकाशित गर्न संचार माध्यमलाई आग्रह गर्दै राजेश हमालले कार्यक्रममा उपस्थित भएर पीडितलाई सहयोग गर्न आग्रह गरेको तर उनले एक अरब रकम उठाएको भन्ने खबर सत्य नभएको स्पस्ट पारे।

यसैबीच उक्त समाचारको बारेमा स्पस्ट पार्दै राजेश हमाल स्वयम् आफैले आफ्नो फेसबुक मार्फत आफू कार्यक्रममा सहभागी मात्र भएको तर उक्त रकम आफुले नभई Giro 555 ले उठाएको भन्दै उक्त रकम उठाउन सहयोग गर्ने सम्पूर्ण नेदरल्याण्डका नागरिक र संघ संस्थालाइ धन्यवाद ज्ञापन गरेका छन्।

नेदरल्याण्डमै समेत नेदरल्याण्डका नागरिक,नेपाली समुदाय हरु उक्त झुटो समाचारको खण्डन गर्दै भ्रमको पछि नलाग्न सबैमा आग्रह गरेका छन्।