केही महिना अगाडि एउटा विज्ञापनको निकै चर्चा भएको थियो- मेस्सी र ड्रोग्बा मोमो खान नेपाल आएको। विज्ञापनमा उनीहरुलाई जुन एयरलाइन्सले नेपाल ल्याएको थियो, त्यो टर्किस एयरलाइन्स थियो। विज्ञापनले नेपालको सकारात्मक प्रचार गरेको भन्दै हामी दङ्ग थियौँ। तर बुधबारदेखि त्यही एयरलाइन्सको एउटा विमानले नेपालको टाउको खाइरहेको छ। नेपालभित्रका मात्र हैनन्, बाहिरकाहरुलाई समेत दुःख दिएको छ। बुधबार बिहान पौने आठ बजेदेखि नेपालको अन्तर्राष्ट्रिय हवाई सम्पर्क टुटेको छ। आज तेस्रो दिन साँझ बल्ल विमानस्थल खुल्ला कि जस्तो भएको छ। दिनहुँ २० हजारभन्दा बढी यात्रु प्रभावित भएका छन्। यो एउटा दुर्घटना थियो, काठमाडौँको विमानस्थलको ६२ वर्षको इतिहासमा पहिलो पटक यस्तो भयो। रनवेमा रहेको विमान हटाउन व्यवस्थापनले प्रयास गरिरहेकै छ। तर हिजो विमानस्थल पुग्दा त्यहाँको अरु अव्यवस्थापन पनि छरपष्ट भयो।