सार्केश्वर मेलाका कारण उड्नेदेखि गुड्नेसम्मलाई सकस

ठूलो मेला लाग्दैछ चाँडै नै नेपालको राजधानी काठमाडौँमा- सार्केश्वरको। मेलाको तयारीका लागि रातोदिन सरसफाइदेखि पुननिर्माण, मर्मतसंभारका काम भइरहेका छन्। खासमा यो मेला दुई दिनको मात्र हो। तर देशविदेशबाट आउने तिर्थालुहरुका कारण पाँच दिनसम्म यसले प्रभाव पार्नेछ। सार्केश्वर मेलाकै लागि शनिबारसहित पाँच दिन स्कूल कलेज विदा हुने भइसकेको छ भने दुई दिन त सरकारले नै सार्वजनिक विदा घोषणा गरेको छ। तर त्यतिले मात्र सकस घट्नेवाला छैन। उड्नेदेखि लिएर गुड्नेसम्मका हजारौँलाई यसले असर पार्नेछ।

सबैभन्दा पहिला गुड्ने कुरा गरौँ। तपाईँको मोटरसाइकल, कार, बस आदि दुई पाङ्ग्रे वा चार पाङ्ग्रे सवारी साधनको नम्बर प्लेटको अन्तिम अङ्क जोर छ कि बिजोर ? जोर छ भने मंसिर ८ गते, १० गते र १२ गते चलाउन पाइनेछ। बिजोर छ भने चाहिँ मंसिर ९ गते र ११ गते मात्रै चलाउन पाइनेछ। ८ देखि १२ गतेसम्म यो प्रणाली लागू हुनेछ। यसलाई पालन नगरे जरिवाना तिर्नुपर्नेछ।

८ गतेको हकमा जानकारी नभएका सवारी साधनहरुलाई सम्झाइबुझाई गर्ने र सोही दिशातर्फ फर्काइदिने गरिनेछ भने ९ गतेबाट सवारी साधनहरुलाई नियन्त्रण र ट्राफिक उल्लंघन गरेबापत जरिवाना गरिनेछ।

मंसिर बिहेको महिना। तर मंसिर ११ गतेको साइतमा बिहे गर्नेले जन्ती बोक्न गाडी बिजोर अङ्कको मात्र चलाउनु पर्नेछ। दुलहादुलही चढ्ने गाडीलाई भने छुट दिइएको छ।

जोरबिजोरमात्र हैन, सार्केश्वरको मेला भर्न आउनेहरुको सवारी चल्दा पनि सवारी साधन र यात्रुले सकस भोग्नुपर्नेछ।

सबभन्दा बिजोग त सार्वजनिक सवारी साधन चढ्ने र चलाउनेहरुको हुनेछ। पुरानो बसपार्क ८ गतेदेखि नै बन्द गरिनेछ। अनि बस चढ्ने ओर्लने कहाँबाट त ?

 सानो-गौचरण :- चाबहिल हुदै मण्डिकाटार- कपन-बौद्ध- जोरपाटी- साखु- सुन्दरीजल- गोठाटार तर्फ चल्ने सवारी साधनहरु उक्त स्थानबाट संचालन गराइने।
 लैनचौर-भैसीचौर:- बालाजु- बनस्थली- टोखा- झोर – फुटुङ्ग- बुढानिलकण्ठ तर्फ चल्ने सवारी साधनहरु उक्त स्थानबाट संचालन गराइने।
 जडीबुटी :- भक्तपुर तथा काभ्रे-बनेपा-धुलीखेल र अरनिको राजमार्ग भएर चल्ने सवारी साधनहरु लाई पेप्सिकोला जडीबुटी सडक खण्ड किनाराबाट संचालन गरिने।
 टि.यू. गेट नजिक :- दक्षिणकाली-फर्पिङ्ग-किर्तिपुर-थानकोट-स्वयम्भू तर्फ चल्ने यात्रुबाहक सवारी साधनलाई टियु गेट अगाडीको सडकको छेउमा १ लाइनमा राखि संचालन गरिने।
 ढुङ्गेअड्डा :- थानकोट , मातातीर्थ, मच्छेगाँउ, नागढुङ्गा तर्फ चल्ने सवारी साधनहरुलाई ढुङ्गेअड्डाबाट संचालन गरिने ।
(उक्त स्थानहरुबाट संचालन हुने सवारी साधनहरुलाई पिक एण्ड ड्रपको मात्र ब्यबस्था मिलाइने)
 सभागृह मोडमा रोकिने माईक्रोबसहरुलाई भद्रकाली मन्दिर नजिक र सहिद गेटबाट पिक एण्ड ड्रपको व्यवस्था गरिने
 रणोद्वीप-भद्रकाली, पद्यमोदय -सभागृह, शंकरदेब- पुरानो बसपार्क खण्डमा सम्मेलन अबधिभर सवारी संचालनमा रोक लगाइने ।
 सार्क सम्मेलन अवधिभर रिङ्गरोड बाहिर वा रिङ्गरोड भित्र रहेका बसपार्कहरुबाट छुट्ने यात्रु बाहक सवारीहरुको हकमा २० मिनेटको अन्तरालमा छुटाउने व्यवस्था मिलाइने ।
 सवारी साधनलाई उक्त अबधिभर बैकल्पिक सडकको प्रयोग गरी व्यबस्थापन गरिने ।

सवारी मार्गमा पनि सकस
– Heavy तथा Slow moving vehicle हरुलाई ३० मिनेट अगाडिबाट सवारी मार्गबाट चलाउन नदिइने।
– सवारी मार्गको बिपरीत दिशाबाट आउने सम्पुर्ण सवारी साधनहरुलाई १५ मिनेट अगाडिबाट चलाउन नदिइने।
– सेम रुटका सम्पुर्ण सवारी साधनहरु १० मिनेट अगाडिबाट चलाउन नदिइने।

उड्ने कुरामा पनि उस्तै

गुड्ने मात्र हैन उड्ने कुरामा पनि सकस हुनेछ। अन्तर्राष्ट्रिय तथा आन्तरिक जहाजहरुको लागि तयार पारेको नोट्याम्स (नोटिस टु एयरम्यान) अनुसार मंसिर ९, १०, ११ र १२ गते आफ्नो तालिका अनुसार उडान गर्न पाउने छैनन्। विशिष्ट पाहुनाहरु आउनुभन्दा आधाघण्टा अघि र पछिसम्म कुनै जहाज उडान तथा अवतरण गर्न निषेध गर्ने काम हुनेछ। यसले डोमेस्टिक र इन्टरन्यासनल दुवै उडान प्रभावित हुनेछन्।

यात्रुहरुको भिसा सकिने, जहाज छुट्ने, कनेक्टिङ फ्लाइट छुट्ने लगायतका समस्या यात्रुले भोग्नु पर्नेछ।

यस्तो छ तालिका
मंसिर ९ गते बिहान नौदेखि बेलुकी पाँच बजेसम्म सार्कका पाहुना बाहेकका उडान- अवतरण गर्न नपाइने
मंसिर ११ गते बिहान आठदेखि १० बजेसम्म र दिउँसो १ देखि १३:४५ सम्म सार्क बाहेक अरु उडान-अवतरण बन्द
मंसिर १२ गते बिहान ८ बजेदेखि १३:१५ बजेसम्म सार्क बाहेकका जहाज उडान तथा अवतरण बन्द
मंसिर ९ देखि १२ गतेसम्म आन्तरिक तथा अन्तर्राष्ट्रिय जहाज पार्किङ सिमित
मंसिर ९, १० र ११ गते कुनै पनि जहाज राती बस्न नपाउने
मंसिर १० गते सबै उडान यथावत तर पार्किङ सिमित

एयर इण्डिया, नेपाल एयरलाइन्स, थाइ एयरवेज, ओमान एयर, कतार एयरवेज, एयर अरेविया, इन्डिगो एयरलाइन्स लगायतका डेढ दर्जन एयरलाइन्सहरुबाट यात्रा गर्ने यात्रु समेत प्रभावित हुनेछन्। थप जानकारी