इन्द्रजात्रामा महिला मात्र रमाउने क्षण

बुधबार राति झम्‌झम् पानी परिरहेको थियो। तर हनुमानढोका दरबार क्षेत्रमा सयौँ महिला आफूहरुमात्र रमाउन पाउने एउटा भर्खरै सुरु गरिएको चलनको प्रतीक्षामा थिए। साताव्यापी इन्द्रजात्रा पर्वको अवसरमा मात्र खोलिने हाथु द्यः (श्वेत भैरव) को विशाल मूर्तिको मुखमा पाइप राखेर त्यसबाट थ्व‍ं (राइस बियर) बगाउने गरिन्छ। त्यो पिएमा स्वस्थ र निरोगी भइन्छ भनिन्छ। पहिले भए जात्राका आठै दिन त्यो चलनमा पुरुषमात्रै रमाउँथे। तर विगत केही वर्षदेखि यो परम्परालाई तोडेर आयोजकहरुले एक दिन महिलालाई मात्र रमाउन दिने निर्णय गरेका छन्। इन्द्रजात्राको पाँचौँ दिन आज त्यही नयाँ परम्परा हेर्न त्यहाँ पुगेको थिएँ। निकै रमाइलो थियो वातावरण। पानी परिरहेकोले राम्रोसित फोटो खिच्न पनि सकिनँ। तैपनि केही फोटो खिचेको छु। हेर्नुस् है।