किताब छाप्न मन लागेको छ तर प्रकाशक भेटिएन? धन्दा नमान्नुस्, यो एपबाट बेच्नुस् किताब

आजभोलि किताब पढ्नेहरु बढेका हुन् कि लेख्नेहरु कुन्नि। जेहोस्, एक किसिमको हलचल छ बजारमा। कहिले जर्सापको किताबले हल्ला पिट्छ, कहिले सुकुलमा बसेर ब्लु फिल्म हेरेको अनुभव रहेको किताबको अंशले। यो सब हेर्दा एउटा किताब त म पनि छाप्छु भन्ने रहर धेरैलाई लाग्दो हो। कसैसित त गज्जबको आइडिया पनि होला किताबबारे। तर छाप्ने कसरी? प्रकाशक पनि भेटिनु पर्‍यो। भेटिएर मात्र भएन, पाठकलाई भन्दा पहिला त्यही प्रकाशकलाई मन पर्नु पनि पर्‍यो। कति गज्जबका प्रतिभा प्रकाशक नभेटिएरै लुकेर रहेका पनि हुनसक्छन्।

तर अब धन्दा नमान्नुस्। एउटा गज्जबको नेपाली एप आएको छ। यो एपबाट तपाईँले आफ्नो किताब मोबाइलमा विद्युतीय स्वरुपमा प्रकाशन गर्न र बेच्न सक्नुहुन्छ। कथालय पब्लिकेसनले बनाएको WeRead नामको यो मोबाइल एपको एन्ड्रोइड स‍ंस्करण आज बुधबार अपराह्न सार्वजनिक गरिँदैछ। आइओएस एप भने एक सातापछि सार्वजनिक हुँदैछ।

कसरी गर्ने ?
यसका लागि तपाईँले विरिड नामको यो एपमा दर्ता हुनुपर्छ। दर्ताका लागि फेसबुक, ट्विटर वा गुगल अकाउन्ट पनि प्रयोग गर्न सकिन्छ। लगइन गरिसकेपछि त्यसबाट अरु किताब किनेर डाउनलोड गरी पढ्न सकिन्छ। त्यसैगरी आफ्नो किताब अपलोड पनि गर्न सकिन्छ।

कथालयका सिइओ राजीवधर जोशीका अनुसार त्यसरी अपलोड भएका किताबहरुको विषयवस्तुलाई सामान्य जाँचिसकेपछि बेच्न राखिन्छ। मूल्य कति राख्ने तपाईँको इच्छा। सित्तैमा राख्छु भने पनि पाउनु हुन्छ।

जाँच्ने चाहिँ किन त ? जोशी भन्छन्, ‘जे पायो त्यही किताब राख्न नहुने भएकोले बेसिक कन्टेन्ट र भाषामात्रै हेर्छौँ, हार्डकपि किताब छाप्नुभन्दा अगाडिको जस्तो नभई लुज चेकिङ नै हुन्छ।’

राम्रो खालको विषयवस्तु छ भने हार्डकपीमा नछापिकनै सोसल मिडियामा प्रचार भएर अनलाइनमै इबुक बेचेर टन्न रोयल्टी पाउन सैद्धान्तिक र प्राविधिक रुपमा अब स‍ंभव भएको छ। राम्रो खालको रेस्पन्स भए त्यस्ता किताब हार्डकपिमा छाप्न पनि सम्झौता गर्न सकिने जोशी बताउँछन्।

पढ्न र किन्न पनि सजिलो
विरिडलाई मोबाइल इबुक स्टोरका रुपमा विकास गर्ने लक्ष्य कथालयको छ। यसमा कथालयका प्रकाशनमात्र हैन, अरु प्रकाशनका किताबहरु पनि बिक्रीका लागि राखिनेछ। त्यसो त कागजमै छापिएको किताब पढ्नुको मज्जा नै बेग्लै हुन्छ। तर पनि मूल्य कम र सजिलै पाइने हो भने इबुक पनि एउटा विकल्प हुन सक्छ। अझ विदेशमा बस्नेहरुलाई त कागजमा छापिएको किताब पाउन धेरै गाह्रो र महँगो पनि पर्न आउँछ।

पान्डुलिपि बुक्सले पनि धेरै भयो इबुक बेच्न थालेको। तर झण्डै हार्डकपिकै जस्तो मूल्यका कारण यो त्यति लोकप्रिय हुन सकेको देखिन्न। मोबाइल, ट्याब जस्ता हातमा बोक्न मिल्ने उपकरणका लागि लक्षित गरी ल्याइएको यो एपको भविष्य चाहिँ के हुने हो, हेर्न बाँकी छ। एप मोबाइलमा पढ्न सजिलो हुने गरी भने बनाइएको छ।

मूल्यका विषयमा जोशी भन्छन्, हाम्रा प्रकाशनहरु तपाईँ हार्डकपिभन्दा सस्तोमा पाउनु हुन्छ। अरु प्रकाशनका किताबहरु पनि सस्तोमा दिन हामी सिफारिश गरिरहेका छौँ। तर यो उहाँहरुको अधिकारको कुरा हो। हामी त यसमा किताब बेच्ने बिक्रेताको भूमिकामा मात्र हुन्छौँ।

बुधबारसम्म ५० देखि ६० वटा किताबहरु विरिडको स्टोरमा राखिसकिनेछन्। हरेक दिन स्टोरमा १० वटासम्म किताब थपिने क्रम जारी रहने उनले बताए। २ महिनाभित्र ५ सयदेखि ७ सय किताब त्यसमा राख्ने लक्ष्य रहेछ।

यो पढ्ने, किन्ने कुरा त छँदैछ, मलाई सबैभन्दा चासो भने आफैले किताब अपलोड गरी बेच्न पाउने सुविधामा रहेको छ। के कुनै नेपाली किताब हार्डकपिमा नछापिकनै इबुकमा बेस्ट सेलर बन्ला? तपाईँलाई के लाग्छ ?

सम्बन्धित लिङ्क
विरिडको एन्ड्रोइड एप