जर्मनीले उचालेको विश्वकपमुनि के छ, देख्नुभाछ ?

अर्जेन्टिनालाई हराउँदै जर्मनीले आज बिहान यसपालिको विश्वकप उचाल्यो। विपक्षी समर्थकलाई छेउ नपर्न धम्की दिनसमेत पछि नपर्ने नेपालमा रहेका अर्जेन्टिनी फ्यानहरुलाई निराश पार्दै अतिरिक्त समय सकिनै लाग्दा युवा खेलाडी गोत्जेले गरेको एकमात्र गोल खेलमा निर्णायक रह्यो।

अब चार वर्षसम्म जर्मनी विश्व फुटबलको सम्राटका रुपमा चिनिनेछ।

जर्मनीले विश्वकप जितेको यो चौथो पटक हो।

चार वर्षपछि सन् २०१८ मा रुसमा हुने विश्वकप खेल्दा जर्मनीको जर्सीमा चार वटा तारा हुनेछ।

विभिन्न मिडियामा तपाईँले विश्वकप देख्नुभा होला। यसको मुनि चाहिँ के छ, देख्नुभा’छ ?

यसमा खोपिएका अक्षरहरु विश्वकप भएको वर्ष र ट्रफी जित्ने देशहरुको नाम हो। यसमा तीन वटा जर्मनी (Deutschland) को नाम हुने भो। खासमा तीन पटक प्रतियोगिता जितेपछि ट्रफी पच गर्न पाउनु पर्ने हो, तर आयोजक फिफाले बनाएको नयाँ नियम अनुसार यसो गर्न जर्मनीलाई दिइने छैन।

यो ट्रफी बन्नुअघि अर्थात् १९३० देखि १९७० सम्म जुल्स रिमेट ट्रफी दिइन्थ्यो विश्वकप जित्नेलाई। १९७० मा तेस्रो पटक उपाधि जितेपछि ब्राजिलले ट्रफी पच पार्‍यो (अर्थात् स्थायी रुपमा आफूसितै राख्ने अनुमति पायो)। तर अहिले ब्राजिलसँग ट्रफी छैन। सन् १९८३ मा चोरी भएको यो ट्रफी अझैसम्म भेटिएको छैन। चोरहरुले सुन गालेर बेचेको अनुमान छ।

ब्राजिलले पच पारेपछि यो नयाँ ट्रफी बनाइएको हो। १८ क्यारेटको (७५% सुन भएको) यो ट्रफी ६ किलोको छ। यो ट्रफी जसले जतिसुकै जिते पनि स्थायी रुपमा राख्न नपाउने नियम फिफाले बनाएको छ। जित्ने देशको नाम भने ट्रफीमुनि खोपिनेछ। जर्मनीले यो कप अर्को प्रतियोगिता नभएसम्म राख्न पाउनेछ। त्यसपछि यसको नक्कल जर्मनीले पाउनेछ।

यो विश्वकप छुने सौभाग्य पाउने एक मात्र नेपाली हुन्- राष्ट्रपति रामवरण यादव। फिफाको साइटमा राखिएको जानकारी अनुसार विश्वकप ८९ देशमा डुलाउने क्रममा गत वर्ष काठमाडौँ आइपुगेको थियो। फिफाको नियम अनुसार राष्ट्रप्रमुखको जस्तो सुरक्षा यो ट्रफीलाई दिनुपर्ने थियो। अनि छुन पनि राष्ट्रप्रमुखले मात्रै पाउँथे।