हारपछिको मार : दक्षिण कोरियाली फ्यानको चकलेट आक्रमण

विश्वकप फुटबलमा सहभागी ३२ राष्ट्रबाट बाँकी रहेका १६ टिममध्ये ८ वटा बाँकी रहनका लागि अहिले खेलहरु भइरहेका छन्। आज क्वार्टरफाइनलका लागि अन्तिम दुई टिम छानिँदैछन्। हारेका टिमहरु धमाधम घर फर्कँदै छन्।

खेलमा हारजित त हुन्छ नै। तर हारमा आत्तिने र जितमा मात्तिनेहरुको कमि छैन।

हारपछिका केही मारहरु यहाँ समेट्दैछौँ।

सबैभन्दा पहिला यो भिडियो हेर्नुस्।

यहाँ दक्षिण कोरियाली खेलाडीहरु देखिन्छन्। एउटा खेल बराबरी गरी दुई वटा खेल हारेर अर्थात् एउटा पनि जित हासिल नगरी फर्किएको कोरियाली टिमलाई विमानस्थलमा दर्शकहरुले चकलेटले हानेर स्वागत गरे।

यो थियो हारपछि आत्तिएकाहरुको काम।

अब जितपछि मात्तिएकाहरुको चर्तिकला पनि हेरौँ।

यो ट्विट नेदरल्यान्डसको वायुसेवा केएलएमले मेक्सिकोलाई अन्तिम मिनेटमा भएको पेनाल्टीमा गोल ठोकेर पराजित गरेपछि गरेको थियो।

यसमा मेक्सिकोलाई जिस्क्याउँदै प्रस्थानको चिह्न देखाइएको छ। त्यतिमात्र हैन प्रस्थानसँगै जुँगामुठे र ह्याट लगाएर मेक्सिकोलाई होच्याउन खोजेको भन्दै सामाजिक सञ्जालमा यसको निकै आलोचना भयो। आलोचित भएपछि केएलएमले यो ट्विट डिलिट गर्न बाध्य भयो।

यसको जवाफमा मेक्सिकोको वायुसेवाले यस्तो ट्विट गर्‍यो-

८७ मिनेटसम्म अग्रता कायम गरेर झण्डै डच टिमलाई हराइसकेको मेक्सिको टिमलाई स्वागतमा गर्व गर्छौँ भन्ने आशय त्यसमा देखिन्थ्यो।

अनि यो ब्राजिलको पत्रिका हेर्नुस्। चिलेसँगको खेल हुनुअघि यो पत्रिकाले चिलेका फ्यानहरुलाई ब्राजिलबाट घर फर्कन कुन एयरलाइन्सबाट कुन बाटो भएर जाँदा कति समय लाग्छ भनेर छापेको थियो। धन्न पेनाल्टीमा चिले हार्‍यो। नभए पत्रिका आफै जोक बन्न बाध्य हुन्थ्यो।

दोस्रो चरणको खेल हुनुअघि माइसंसारले गरेको अहिलेसम्मको अनुमानमा एउटा मात्र मिलेको छैन। कोस्टा रिका र ग्रिसबीचको खेलमा ग्रिस जित्ने अनुमान गलत भएको छ। बाँकी सब खेलको अनुमान अहिलेसम्म मिलेको छ। आजका दुई खेलको अनुमान के हुन्छ हेरौँ।

अहिलेसम्मको परिणाम अनुसार क्वार्टर फाइनल शुक्रबार फ्रान्स/जर्मनी र ब्राजिल/कोलम्बिया बीच हुनेछ। त्यसैगरी शनिबार नेदरल्यान्डस्/कोस्टारिकाबीच हुनेछ। भोलि र पर्सि भने विदा।