हाम्रा प्रधानमन्त्रीले कसलाई खुकुरी उपहार दिनुभो?

दायाँ छेउको फोटो ध्यान दिएर हेर्नुस्।

हाम्रा प्रधानमन्त्री सुशील कोइरालालाई त चिनिहाल्नुभो। सँगैको अर्को को ?

नेपाली त हैनन् कि के हो ?

हेर्दा नेपाली जस्ता देखिन्नन्। त्यसो भए को त ? अनि हाम्रा प्रधानमन्त्रीले के दिन लाग्नुभा तिनलाई ?

यी हुन् नाइजेरियाका सैनिक E M Wenebai

हाम्रा प्रधानमन्त्रीले उनलाई तालिममा उत्कृष्ट भए वापत् पुरस्कार स्वरुप खुकुरी दिएका हुन्।

तालिम ? के तालिम, कस्तो तालिम भन्नुभाको ?

नेपाली सैनिक प्रतिष्ठानमा यसपालि पहिलो पटक विदेशी अधिकृत क्याडेटहरु समावेश गरी तालिम चलाइएको थियो। त्यसमा नाइजेरिया, मालदिभ्स र केन्याबाट एक-एक जना अधिकृत क्याडेट तालिममा सहभागी भएका थिए।

पश्चिम अफ्रिकाको सामरिक र आर्थिक शक्ति राष्ट्रको रुपमा रहेको नाइजेरिया, पूर्वी अफ्रिकाको सामरिक र आर्थिक शक्ति राष्ट्रको रुपमा रहेको केन्या र दक्षिण एसियामा अवस्थित मित्रराष्ट्र माल्दिभ्सका सेनाबाट सहभागी अधिकृत क्याडेटमध्ये यिनी उत्कृष्ट अधिकृत क्याडेट हुन सफल भएका थिए।

२४ महिनाको यो तालिममा २० जना महिला, २२० जना अधिकृत क्याडेट, ३३ जना पदिक/हुद्धा अधिकृत क्याडेट तथा ३ जना विदेशी अधिकृत क्याडेट सहित २७६ जना अधिकृत क्याडेेटहरु शुक्रबारदेखि सहायक सेनानीको दर्जामा नियुक्त भए।

नेपाली सेनाका अन्य तालिम शिक्षालयहरु (माउण्टेन वारफेयर, जंगल वारफेयर, प्यारा बेशिक तथा स्टाफ कलेज) बाट हालसम्म करिव ३०० जना भन्दा बढी विदेशी सैनिक अधिकृत, पदिक तथा अन्यदर्जाहरुले तालिम प्राप्त गरिसकेको सेनाले जनाएको छ।

समारोहमा प्रधानमन्त्रीले अधिकृत क्याडेट आधार तालिममा सर्वप्रथम हुने अधिकृत क्याडेट दिपेन्द्र विक्रम के.सी., पदिक/हुद्धा अधिकृत क्याडेट आधार तालिममा सर्वप्रथम हुने पदिक/हुद्धा अधिकृत क्याडेट गणेश कार्की, महिला अधिकृत क्याडेटमा सर्वाेत्कृष्ट हुने अधिकृत क्याडेट रश्मीला अर्याल, स्नातक तहको शैक्षिक अध्ययनतर्फ प्रथम हुने अधिकृत क्याडेट रविन श्रेष्ठलाई पुरस्कार प्रदान गर्नुभएको थियो। (फोटोः नेपाली सेना)