राष्ट्रपति कार्यालयको गाइजात्राः सभामुखको शपथ कात्तिकमा भएको रे, त्यतिखेर त चुनावै भा’को थिएन

अस्ति हाकाहाकी प्रधानमन्त्री सुशील कोइरालाले संसदलाई ढाँटेको आरोप लाग्यो- राष्ट्रपतिले कुनै निर्देशन दिएका छैनन् भन्दै। तर राष्ट्रपति कार्यालयको साइटमा भने सात बुँदे ‘यो यो गर्नू’ भन्ने लेखेको विज्ञप्ति बाकाइदा राखिएको थियो।

देशको सर्वोच्च व्यक्ति राष्ट्रपतिको कार्यालयको साइटमा त्यो मात्र हैन, अरु गलत जानकारी पनि प्रशस्तै रहेछन्। तपाईँलाई थाहा छ कि छैन पहिले सभामुख सुवास नेम्वाङको शपथ ग्रहण भयो कि प्रधानमन्त्री सुशील कोइरालाको ? पक्कै पनि सुशील कोइरालाको। तर राष्ट्रपति कार्यालयको आधिकारिक साइट भन्छ- नेम्वाङको पहिले भयो। नेम्वाङको शपथ कात्तिकमै भएको हो अर्थात् २०७०/७/७ मा। यो भन्दा अनौठो कुरा अरु के हुनसक्छ ? कात्तिकमा त संविधान सभाको निर्वाचन समेत भएको थिएन। मतदान त मंसिर ४ मा बल्ल भएको हो।

हेर्नुस् राष्ट्रपति कार्यालयको साइटमा के लेखिएको छ-

त्यसैगरी राष्ट्रपति कार्यालयको साइटलाई मान्ने हो भने त प्रधानमन्त्रीको शपथ भएकै छैन रहेछ। आज बल्ल फागुन १२ गते हो। तर साइटमा लेखिएको छ- सम्माननीय राष्ट्रपति डा. रामवरण यादवले मिति २०७०/११/२८ गते मङगलबार राष्ट्रपति भवन, शीतलनिवासमा आयोजित एक विशेष समारोहकाबीच व्यवस्थापिका–संसदबाट नवनिर्वाचित सम्माननीय प्रधानमन्त्री सुशील कोइरालालाई पद तथा गोपनीयताको शपथ गराउनु भयो।

अर्थात् फागुन २८ गते। राष्ट्रपति कार्यालय त टाइम ट्राभल पनि गर्न सक्ने रहेछ। समयभन्दा अगाडि फागुन २८ गतेमा पुगेर शपथ ग्रहणको फोटो खिचेर ल्याएर राख्न भ्याइसक्यो।

हेर्नुस् के लेखिएको छ-

आधिकारिक विज्ञप्ति र जानकारी हुनुपर्ने राष्ट्रपति कार्यालयको साइटमा यस्तो हचुवा र गलत अनि दुनियाँ हँसाउने जानकारी कसले राख्यो ?

कतै प्रधानमन्त्री सुशील कोइरालाले सही बोलेका त हैनन् ? त्यो सात बुँदे निर्देशन पनि उनलाई दिएकै हैन, साइटमा यत्तिकै कसैले हालिदिएको त हैन ?