प्रत्यक्षको अन्तिम सिट माओवादीको पोल्टामा, समानुपातिकमा कांग्रेसको एक सिटले अग्रता

मंसिर ४ मा देशभर भएको संविधान सभा निर्वाचन भाग २ अन्तर्गत प्रत्यक्ष (पहिलो हुने निर्वाचित हुने प्रणाली)तर्फका सबै २४० निर्वाचन क्षेत्रको मतपरिणाम ६ दिनपछि आज सार्वजनिक भएको छ। ४ गते स्थगित भएको सप्तरी २ को एउटा केन्द्रको निर्वाचन शनिबार भएको थियो। आज अर्थात् मंसिर १० सोमबार मतगणना सकियो। यो अन्तिम सिट माओवादीको पोल्टामा गयो। सप्तरी क्षेत्र नम्बर २ बाट एकीकृत नेकपा (माओवादी) का उम्मेदवार अशोककुमार मण्डल ६ हजार ५७ मत प्राप्त गरी विजयी भए। निकटतम प्रतिस्पर्धी सद्भावना पार्टीका नवलकिशोर साह सुडीले ५ हजार ६२४ मत मधेसी जनअधिकार फोरम नेपालका चन्द्रनारायण यादवले ४ हजार ८३५ मत पाए।

यसै अनुसार अन्तिम परिणाम यस्तो रह्यो- नेपाली कांग्रेस १०५, नेपाल कम्युनिष्ट पार्टी (एमाले) ९१, एकीकृत नेकपा (माओवादी) २६, मधेसी जनअधिकार फोरम नेपाल (लोकतान्त्रिक) ४, तराई–मधेस लोकतान्त्रिक पार्टी ४, राष्ट्रिय प्रजातन्त्र पार्टी ३, मधेसी जनअधिकार फोरम नेपाल २, नेपाल मजदुर किसान पार्टी १, सद्भावना पार्टी १ र तराई–मधेस सद्भावना पार्टी नेपाल १, स्वतन्त्र २।

समानुपातिक प्रणालीतर्फ ७९ क्षेत्रमा मतगणना सम्पन्न
समानुपातिक निर्वाचन प्रणालीतर्फको मतगणना भने जारी छ। सोमबार साँझ साढे ५ सम्ममा ७९ वटा निर्वाचन क्षेत्रको मतगणना सम्पन्न भइसकेको छ।

निर्वाचन आयोगका अनुसार समानुपातिक प्रणालीतर्फको मतगणना सम्पन्न भएका जिल्ला र निर्वाचन क्षेत्र यस प्रकार छन् :

• पाँचथर, तेह्रथुम, भोजपुर, धनकुटा, रसुवा, धादिङ्ग, नुवाकोट, मनाङ, कास्की, तनहुँ, मुस्ताङ, म्याग्दी, रुकुम, रोल्पा, डोल्पा, हुम्ला, डोटी, दैलेख, डडेल्धुरा, खोटाङ, पर्सा, गोरखा, प्यूठान, बर्दिया र बैतडी गरी २५ जिल्लाका सबै निर्वाचन क्षेत्र।

• त्यसैगरी, मोरङ क्षेत्र नम्बर ४, ६ र ९, गुल्मी क्षेत्र नम्बर १ र ३, रुपन्देही क्षेत्र नम्बर १, २ र ६, वाग्लुङ क्षेत्र नम्बर २ र ३, दाङ क्षेत्र नम्बर १, २ र ४, मकवानपुर क्षेत्र नम्बर १ र ३, रौतहट क्षेत्र नम्बर १, काठमाडौ क्षेत्र नम्बर ८, झापा क्षेत्र नम्बर २, चितवन क्षेत्र नम्बर २, कपिलवस्तु क्षेत्र नम्बर ३, पाल्पा क्षेत्र नम्बर ३, सिरहा क्षेत्र नम्बर २, उदयपुर क्षेत्र नम्बर २, कञ्चनपुर क्षेत्र नम्बर ३ र ४ तथा संखुवासभा क्षेत्र नम्बर १ को पनि समानुपातिक प्रणालीतर्फको मतगणना सकिएको छ।

• हाल सप्तरी क्षेत्र नम्बर २ बाहेकका निर्वाचन क्षेत्रमा मतगणना कार्य जारी छ।

[प्रोजेक्सन अपडेट साँझ ६:१०] समानुपातिकमा एक सिटले कांग्रेसको अग्रता
अघिल्लो अपडेटभन्दा सिट संख्यामा खासै परिवर्तन भएको छैन। ६:१० सम्म ३८ लाख १० हजार १८६ मत गनिसकिएको छ। पहिलोमा कांग्रेस रहेको छ। उसको मत १० लाख पुग्न लागेको छ। समानुपातिकमा सुरुदेखि अग्रता लिइरहेको एमाले कांग्रेसको पछिपछि छ। तेस्रोमा माओवादी छ भने चौथोमा राप्रपा नेपाल छ। यति मतमा कति सिट पाइएला भन्ने अनुमान यसअघि ५२० मा गरिएको प्रोजेक्सनभन्दा खासै फरक छैन।

[प्रोजेक्सन अपडेट साँझ ५:२०] समानुपातिकमा एक सिटले कांग्रेसको अग्रता
प्रत्यक्षतर्फ १४ सिटले एमालेलाई उछिनेको कांग्रेस समानुपातिकमा चाहिँ पछाडि परिरहेको भए पनि आजदेखि यसमा पनि कांग्रेसले अग्रता लिन थालेको छ। देशका २४० मध्ये १५२ क्षेत्रमा भइरहेको मतगणनाका परिणाम आएपछि कांग्रेसको समानुपातिक मत स‌ंख्या बढेको हो। साँझ ५२० बजे आयोगले उपलब्ध गराएको ३७ लाख ८७ हजार ३४५ मतलाई अन्तिम मान्ने हो भने समानुपातिकमा कांग्रेसले एमालेलाई १ सिटले मात्रै उछिनेको हुनेछ। कांग्रेस ९२ सिट र एमाले ९१ सिटमा छ। अघिल्लो संविधान सभामा १०० समानुपातिक सिट पाएको माओवादीले अहिलेको मतगणनालाई अन्तिम मान्ने हो भने ५७ सिट मात्रै पाउनेछ। अघिल्लोमा ४ सिट मात्रै भएको राप्रपा नेपालले चाहिँ २६ सिट पाउनेछ। मतगणनाको थप परिणाम आएसँगै यो सिट संख्यामा घटबढ हुनसक्नेछ। अरु साना दलहरुले कति सिट ल्याउलान् त ? हेर्नुस् सूचि।

अरु मिडियामा कुन पार्टीले कति मत पाए भन्नेमात्रै दिइएको छ, हामी भने निर्वाचन आयोगले गणना गर्ने विधि अनुसार नै त्यति भोटबाट आउने सिटको प्रोजेक्सन गर्दैछौँ। यो नै अन्तिम भने हैन। मतगणनासँगै पाइने मत अनुसार यो सिट संख्या घटबढ हुनसक्नेछ। अर्थात् कुनै क्षेत्रमा कांग्रेसले ह्वात्तै मत बढायो भने केही समयको लागि कांग्रेसको बढी सिट देखिन सक्छ। कतै एमालेले ह्वात्तै बढायो भने एमाले अघि देखिन सक्छ। प्रत्यक्षतर्फ २४० र समानुपातिकमा ३३५ सिट रहेका छन्। हालसम्मको तथ्याङ्क अनुसार समानुपातिकमा सहभागी १२२ पार्टीमध्ये कुन पार्टीले कति सिट ल्याउनेछ प्रोजेक्सनको पूर्ण विवरण