राप्रपा नेपालका सेलिब्रिटी उम्मेदवारहरुको जमानत जफत

गणतन्त्रको विरोध गर्दे राजतन्त्र फर्काउनु पर्ने माग गर्दै ८० प्रतिशत हिन्दु भएको देशमा हिन्दुत्वको कार्ड फ्याँक्ने राप्रपा नेपाललाई यस पटक संविधान सभा निर्वाचनले कस्तो स्थितिमा पुर्‍याउने हो, अहिले नै आँकलन गर्न गाह्रो छ। तर राप्रपाले ३ सिट ल्याइसक्दा पनि कमल थापाको गाई पार्टीले अहिलेसम्म एक ठाउँ पनि प्रत्यक्ष सिट जित्न सकेको छैन। तर बाहिरबाहिर हेर्दा माओवादीको जस्तै गाईको लहर पनि आएकै देखिन्थ्यो। अन्तरिम संविधान समेत नमान्ने पार्टीको लहर देखेर मान्छेहरु आत्तिएकै हुन्। समानुपातिक तर्फ पहिलो पार्टी बन्छौँ भनी कमल थापा पनि मात्तिएकै हुन्। तर समानुपातिकतर्फको प्रारम्भिक मतगणना परिणामले त्यो संकेत देखाएको छैन। एक भोट दाइलाई, एक भोट गाईलाई भन्ने यो निर्वाचनको चर्चित नारा अनुसार भोट नखसी सूर्य र रुखमै जनताले छाप हानेको देखिएको छ। यद्यपि पूरा परिणाम आउन बाँकी छ। अघिल्लो निर्वाचनमा देखे कि कालोमोसो लगाउने प्रतिकूल परिस्थितिमा समेत १ लाख १० हजार ५१९ मत ल्याएर चार सिट जितेको गाई पार्टीले यस पटक सिट संख्या पक्कै पनि बढाउनेछ, त्यसमा भने शंकै छैन। तर जति हौवा हो, त्यसको परीक्षण अहिले हुँदैछ।

राप्रपा नेपालका सेलिब्रिटी उम्मेदवारहरु भने जमानतै जफत हुने गरी लज्जास्पद पराजय भोग्न बाध्य भएका छन्।

माओवादीले एबिसी टेलिभिजनको दुरुपयोग गरे जस्तै गाई पार्टीले हलमालिक उद्दव पौडेलले आफ्नो टेलिभिजनबाट कलाकारहरुलाई गाईमा भोट हाल्न आह्वान गरे पनि काठमाडौँ ४ मा उनको गगन थापाको अगाडि केही जोर चलेन। मात्र ३ हजार २६३ मत पाई उनी जमानत जोगाउन समेत असफल भए।

त्यसैगरी माया मेरी माया, हाम्रो मिलन कहिले हुन्छ, एउटा गाउँ थियो… जस्ता चर्चित गीतका गायक सञ्जय श्रेष्ठ पनि काठमाडौँका भिमसेन दास प्रधानको अगाडि लज्जास्पद पराजय भोग्न बाध्य हुनुपर्‍यो। जम्मा २ हजार ३८५ भोट पाएर जमानत जोगाउन नसकेका उनको लागि एउटै सान्त्वनाको कुरा भने काठमाडौँ उपत्यकाका पूर्व मेयर केशव स्थापितभन्दा दोब्बरभन्दा बढी मतले अगाडि हुनु रहनेछ।

त्यस्तै, मखमली चोलो चाहिँदैन, रेशमको सारी चाहिँदैन… जस्तो चर्चित गीत गाउने गायिका मिरा राणालाई पनि काठमाडौँ ३ का मतदाताले ‘चाहिँदैन, तिमी चाहिँदैन’ भनिदिए। चाहिन्छ भन्नेको सं‍ख्या यति कम थियो कि उनी पनि जमानत जोगाउन असफल भए।

राप्रपा नेपालका तर्फबाट सेलिब्रिटी बाहेकका उम्मेदवारले भने बरु माओवादी उम्मेदवारलाई समेत पछारे। काठमाडौँ ८ का प्रकाश रिमाल एक उदाहरण हुन् जसले जमानत जफत हुने गरी पराजित हुने पूर्व महान्यायाधिवक्ता मुक्ति प्रधानभन्दा बढी भोट ल्याए।

काठमाडौँका कुन कुन क्षेत्रमा कसले कति मत ल्याए ?

कूल सदर मत मध्ये १० प्रतिशत नल्याउनेको जमानत जफत हुन्छ। जमानत जफतको अर्थ उम्मेदवार मनोनयन गर्दा राखिने तीन हजार रुपियाँ जफत हुनु हो। तीन हजार रुपियाँ खासै ठूलो कुरा नहोला, तर जमानत जफत भएको भन्नु लज्जास्पद पराजय हो। त्यसैले यसले अर्थ राख्ने हो।

जिल्ला: काठमाडौं