खिलराजले पनि युएनबाहिर कालो झण्डाको सामना गर्नुपर्ने

देशको विषम परिस्थितिमा संविधान सभाको निर्वाचन गराउने गहन जिम्मेवारी बोकेर कार्यपालिकाको समेत जिम्मेवारी सम्हालेका प्रधान न्यायाधीश खिलराज रेग्मीलाई संयुक्त राष्ट्र संघको महासभामा सहभागी हुन अमेरिका जान जरुरी नभएको टिप्पणी गर्नेहरु निकै छन्। बीचमा त अन्तरिम चुनावी परिषद्का अध्यक्ष रेग्मी न्युयोर्क नजाने हल्ला पनि चल्यो। लगत्तै खण्डन पनि भयो- रेग्मी जाने बरु गृहमन्त्री चाहिँ नजाने! जानु पर्ने/नपर्ने विवादका बीच अमेरिका उड्न लागेका रेग्मीले उता पनि विरोधको सामना गर्नुपर्ने भएको छ। युएनबाहिर उनलाई कालो झण्डा देखाउने कार्यक्रम सार्वजनिक भएको छ।


विरोधको कार्यक्रम सुर्खेत काँक्रेविहार बुद्धमूर्ति प्रतिस्थापना संयुक्त सरोकार समितिले सार्वजनिक गरेको हो। समितिका अनुसार पूर्व सहमति भएकै स्थानमा बुद्धमूर्ति प्रतिस्थापना गर्न पाउनु पर्ने माग राख्दै चोथौ चरणको शान्तिपूर्ण आन्दोलन घोषणा गरिएको हो।

कार्यक्रममा असोज ११ र १२ गते मन्त्रिरिषद् अध्यक्ष रेग्मीलाई न्यूयोर्कस्थित संयुक्त राष्ट्रसंघ भवनको प्रवेश द्वारमा बौद्धमार्गी र विभिन्न आदिवासी जनजातिहरूले प्लेकार्ड र कालो झण्डा प्रदर्शन गरिनेछ।

समितिको विज्ञप्ति यस्तो छ-

सुर्खेत जिल्लाका स्थानीय बौद्धमार्गीहरूले लाटीकोइली गाविस वडा नं ८ अवस्थित काँक्रेविहार परिसरमा राष्ट्रिय विभूति भगवान् बुद्धको एक थान प्रतिमा स्थापना गर्ने क्रममा स्थानीय प्रहरी प्रशासनले रोक लगाएपछि त्यसको विरोधमा सम्पूर्ण बौद्धमार्गी तथा आदिबासी जनजातिहरू आन्दोलनरत रहेको व्यहोरा सर्वविदितै छ। हामीले विगत विभिन्न मितिमा यथाशीघ्र पूर्वसहमति अनुसार बुद्धमूर्तिलाई सोही स्थानमा प्रतिस्थापना गर्नको लागि शान्तिपूर्ण आन्दोलनद्वारा नेपाल सरकारको सम्बन्धित निकायलाई ध्यानाकर्षण गराउँदै तेस्रो चरणसम्मको शान्तिपूर्ण आन्दोलनको कार्यक्रम सफलतापूर्वक सम्पन्न भएको छ। शान्तिपूर्ण आन्दोलनलाई सहयोग गर्नुहुने सम्पूर्ण नेपाली जनताको साथै न्यायपूर्ण आन्दोलनको कार्यक्रमलाई समाचार संकलन, छायांकन तथा सम्प्रेषण गरी सहयोग गर्नु हुने सञ्चारकर्मीहरूलाई हामी आन्दोलनकारी संघ सस्थाहरूको तर्फबाट हार्दिक आभार प्रकट गर्दछौं।

हामी सरोकारवाला बौद्ध धर्मावलम्बी संघ संस्थाहरू र नेता नेतृत्वको संयुक्त प्रतिनिधस मण्डलले यो घटनाको कडा विरोध गर्दै बुद्धको मूर्तिलाई १५ दिन भित्र प्रतिस्थापना गरियोस् भनेर मितिः २०७० असार ८ गते नेपाल सरकार अन्तरिम चुनावी मन्त्री परिषद्का अध्यक्ष सम्माननीय खिलराज रेग्मीज्यूलाई ज्ञापन–पत्र बुझाएका थियौं। तर उक्त समयसीमाभित्र बुद्धमूर्ति प्रतिस्थापना गर्ने मागलाई सरकारले पूरा गर्न सकेको छैन् । त्यसकारण हामी सम्पूर्ण बौद्धमार्गीहरूले सरकारको यस्तो रवैया बिरूद्ध खेद प्रकट गर्दै तेस्रो चरणसम्मको शान्तिपूर्ण आन्दोलन सफलतापूर्वक सम्पन्न गरी चोथौं चरणको शान्तिपूर्ण आन्दोलन घोषणा गर्न पत्रकार साथीहरू माझ यो पत्रकार सम्मेलन आयोजना गरेका छौं।

चौथौं चरणको आन्दोलनको कार्यक्रम
१) २०७०।०६।८ पत्रकार सम्मेलन १ बजे फोनिज, अनामनगर
२) २०७०।०६।११ र १२ मन्त्रिपरिषद अध्यक्षलाई संयुक्त राष्ट्रसंघको भवन प्रवेश द्वारमा बौद्धमार्गी र विभिन्न आदिबासी जनजातिहरूले प्लेकाड र कालो झण्डा प्रदर्शन- न्यूयोर्क
३) २०७०।०६।१० आन्दोलनकारी संघसंस्थाहरू बीच बिचार गोष्ठी १२ वजे बौद्ध गडेन भान्साघर, तीनचुली, बौद्ध
४) २०७०।०६।१५ विभिन्न धार्मिक समुदाय, नागरिक समाज बुद्धिजीवीहरूसँग अन्तरक्रिया कार्यक्रम १–३ काठमाडौं
५) २०७० असोज महिना भित्र धर्म निरपेक्ष राज्यको सिद्धान्त विपरीत राज्य सरकारले राष्ट्रिय विभूति गौतम वुद्ध लगायत विभिन्न धार्मिक समुदाय माथि गरेको विभेदको विरुद्धमा धरान सुनसरी,मकवानपुर, चितवन,पोखरा,लुम्बिनी, दाङ्ग र सुर्खेतमा क्षेत्रीय विरोध सभा गर्ने

हाम्रा माग
१) सुर्खेत, काँक्रेबिहार परिसरमा राख्न खोजीएको बुद्धको सो मूर्तिलाई सोही स्थानमा नै प्रतिस्थापना गर्नु पर्ने ।
२) बुद्ध जयन्तीको पावन अवसरमा सुर्खेतमा बौद्धमार्गीहरूको झाँकी ¥याली माथि प्रहरी प्रशासनले गरेको कुटपिट र दुव्र्यवहार प्रति स्थानीय प्रशासनबाट स्थानीय बौद्धमार्गीहरू समक्ष सार्वजनिक रूपमा माफी माग्नु पर्ने ।
३) आगामी दिनमा मुलुकको कुनै पनि भूभागमा रहेको बौद्ध धर्मावलम्बीहरूको आस्थाको केन्द्र गोन्पा, विहार, बही, बहाल, चैत्य, मूर्ति आदि आस्थाको केन्द्र रहेको क्षेत्र वा स्थानहरूमा बौद्धमार्गीहरूमाथि यस्ता दुव्र्यवहार नहुने कुराको सरकारबाट ग्यारेन्टी सुनिश्चितता गर्नु पर्ने ।
सुर्खेत काँक्रेविहार बुद्धमूर्ति प्रतिस्थापना संयुक्त सरोकार समिति